Qahva narxi ko‘tariladi: 2025-yil ichimlik ixlosmandlari uchun sinovli yil bo‘ladi
Yetkazib beruvchilarning ogohlantirishi bo‘yicha, 2025-yilda qahva narxi kamida 25 foizga oshadi. Bunga xomashyoning keskin qimmatlashuvi sabab bo‘lib, birja ko‘rsatkichlari rekord darajaga yetdi. Jumladan, arabika narxi 1977-yildan buyon eng yuqori darajaga ko‘tarildi, robusta narxi esa so‘nggi bir yil ichida ikki baravardan ziyod oshdi.
“Roschaykofe” uyushmasi bosh direktori Ramaz Chanturiya bu vaziyat misli ko‘rilmagan ekanini ta’kidladi. Ilgari arabika narxi oshganda robusta narxi ozgina ko‘tarilgan bo‘lsa, bu yil ikkala tur ham bir vaqtning o‘zida va bozor hali guvoh bo‘lmagan miqyosda qimmatlashdi.
Narx oshishiga bir nechta omil sabab bo‘ldi. Ular orasida ishlab chiqaruvchi mamlakatlar, jumladan Braziliya va Vetnamdagi yomon hosildorlik bor, bu yerlarda kelgusi yil uchun bashoratlar ham ko‘ngildagidek emas. Bundan tashqari, dunyoda qahvaga bo‘lgan talab taklifdan oshib ketishda davom etmoqda, bu esa birjalardagi ajiotajni kuchaytirmoqda. Shu fonida spekulyantlar faol harakat qilib, narxlar tebranishini yanada kuchaytirmoqda.
Mutaxassislar ta’kidlashicha, odatda har o‘n yilda bir marta kuzatiladigan qahva narxining pasayish davri endi buzilgan. 2025-yil, chamasi, ham sanoat, ham iste’molchilar uchun haqiqiy sinovga aylanadi, chunki ichimlik narxlarining keyingi o‘sishi muqarrar ko‘rinmoqda.