TDT mamlakatlari harbiy hamkorlikni kuchaytirmoqda
Turkiyada o‘tkazilayotgan SAHA EXPO-2024 xalqaro ko‘rgazmasi doirasida Qozog‘iston mudofaa vaziri Baykar Defence kompaniyasi bosh direktori bilan muzokaralar olib bordi. Uchrashuv davomida tomonlar Qozog‘istonda taktik uchuvchisiz aviatsiya tizimlari va operativ darajadagi barrajer o‘q-dorilarini ishlab chiqarishni mahalliylashtirish bo‘yicha yo‘l xaritasini tuzishga kelishib oldilar.
Turkiya Qozog‘iston Qurolli Kuchlariga Bayraktar Kalkan, Bayraktar Mini uchuvchisiz uchish tizimlarini, shuningdek, harbiy sinovlarni o‘tkazish uchun Mosquito-X operativ barrajer o‘q-dorilarini bepul taqdim etishga tayyorligini tasdiqladi.
Ayni paytda, Qozog‘istonning strategik korxonasi bo‘lgan “Zenit” Ural kemasozlik zavodini xususiylashtirish dasturiga kiritish mumkinligi haqidagi xabarlar tarqaldi. OAV ma’lumotlariga ko‘ra, zavod ustidan nazorat Turkiyaning YDA Group kompaniyasiga o‘tishi mumkin.
“Zenit” Qozog‘iston mudofaa sanoatining asosiy korxonasi hisoblanib, mamlakatda kemasozlik sohasini noldan yaratgan yagona zavoddir. Zavod o‘z tarixi davomida 34 ta kema qurgan. Uning tarixi 1921-yilda Leningradda boshlangan va 1941-yilda korxona Uralskka ko‘chirilgan.