Olimlar Santa-Klausning qiyofasini tiklashdi
Deyarli 1700 yildan so‘ng olimlar ilk bor Avliyo Nikolayning yuzini qayta tiklashga muvaffaq bo‘lishdi, bu esa Santa-Klausning afsonaviy qiyofasiga haqiqiy asos berdi.
IV asrda Mira shahrida (hozirgi Turkiya hududi) yashagan Avliyo Nikolay o‘zining saxovatliligi va muhtojlarga yordam bergani bilan mashhur bo‘lgan. Uning ishlari Gollandiyada Sinterklaas obrazi yaratilishiga ilhom berdi, AQShda esa bu obraz Santa-Klausga aylangan. Ammo Nikolayning hayoti davrida chizilgan birorta ham tasviri saqlanmagan.
Zamonaviy texnologiyalar yordamida Sisero Moraes boshchiligidagi tadqiqotchilar guruhi 1950-yillarda yig‘ilgan bosh suyagi ma’lumotlari asosida uning yuzini rekonstruktsiya qilishdi. Olimlar 3D-modellashtirish, anatomik proyeksiyalar va statistik usullardan foydalandi. Olingan qiyofa, uning keng yuz chizgilari va qalin soqoli, 1823 yilda yozilgan “Rojdestvo kechasi” she’ridagi Santa-Klaus tasviriga hayratlanarli darajada o‘xshash.
Yuzni tiklashdan tashqari, tadqiqotlar avliyo artritdan aziyat chekkanini va ehtimol, tez-tez bosh og‘rig‘i bo‘lganini ko‘rsatdi. Uning ovqatlanishi asosan o‘simlik mahsulotlariga asoslangan bo‘lishi mumkin.
Avliyo Nikolay nasroniylik tarixida chuqur iz qoldirgan va yaxshilik hamda mehr-oqibat timsoliga aylangan. Uning eng mashhur ishlari orasida kambag‘al qizlarga sep uchun pul to‘lab bergani va bolalarni qutqarish haqidagi afsonalar bor. Uning qoldiqlari hozirda Italiyadagi Bari shahrida saqlanadi.