MDH Iqtisodiy kengashi 2030-yilgacha o‘zaro investitsiyalarni rag‘batlantirish chora-tadbirlarini tasdiqladi
Toshkentda MDH Iqtisodiy kengashining 105-yig‘ilishi bo‘lib o‘tdi. Unda Hamdo‘stlik mamlakatlari hukumatlarining yuqori martabali vakillari, jumladan bosh vazir o‘rinbosarlari va tegishli idoralar rahbarlari ishtirok etdilar. Majlisni MDH Iqtisodiy kengashi raisi, Tojikiston Respublikasi Bosh vazirining birinchi o‘rinbosari Xokim Xoliqzoda ochib berdi va boshqardi.
Yig‘ilishning asosiy qarori MDH doirasida 2030-yilgacha bo‘lgan davrda o‘zaro investitsiyalarni jalb qilish va rivojlantirishni rag‘batlantirish bo‘yicha kompleks chora-tadbirlarni tasdiqlash bo‘ldi. O‘zbekiston Prezidenti Shavkat Mirziyoyev tashabbusi bilan ishlab chiqilgan hujjat MDH mamlakatlarida investitsiya muhitini yaxshilash, to‘g‘ridan-to‘g‘ri xorijiy investitsiyalar oqimini ko‘paytirish va ularni samarali amalga oshirishga qaratilgan.
Delegatsiyalar rahbarlari MDHga a’zo davlatlarning havo harakatini tashkil etish milliy tizimlarini uyg‘unlashtirish konsepsiyasi loyihasini ham ma’qulladilar. Konsepsiyaning maqsadi havo hududidan foydalanishning iqtisodiy samaradorligini oshirish, xalqaro aeronavigatsiya uchun "shaffof" chegaralarni ta’minlash va foydalanuvchilarga yagona qoidalar va texnologiyalar asosida xizmat ko‘rsatishdir. Konsepsiyaning amalga oshirilishi fuqaro aviatsiyasi parvozlarining xavfsizligi, muntazamligi va tejamkorligini oshirishi kutilmoqda.
Kengash MDHga a’zo davlatlarning aholi salomatligini muhofaza qilish sohasidagi hamkorligi konsepsiyasi loyihasini ko‘rib chiqib, ma’qulladi. Hujjat sog‘liqni saqlash bo‘yicha kelishilgan harakatlarni amalga oshirish, jamoat salomatligi, sog‘liqni saqlash va farmatsiyani rivojlantirishda davlatlararo hamkorlik uchun shart-sharoitlar yaratish, shuningdek aholining turmush sifatini oshirishga qaratilgan.
Bundan tashqari, MDHga a’zo davlatlarning yengil sanoat sohasidagi hamkorligini rivojlantirish Konsepsiyasi va uni amalga oshirish bo‘yicha chora-tadbirlar rejasi loyihalari taqdim etilib, ma’qullandi. Ular ichki manbalar hisobidan yengil sanoat mahsulotlariga bo‘lgan ehtiyojni qondirish, milliy xavfsizlikni mustahkamlash, sohaning ilmiy ta’minotini rivojlantirish va innovatsiyalarni joriy etishga yo‘naltirilgan.
Iqtisodiy kengash a’zolari MDHga a’zo davlatlarning og‘ir mashinasozlik tarmoqlarini rivojlantirish bo‘yicha hamkorligi to‘g‘risidagi bitim loyihasini ma’qulladilar. Bitim sanoat ishlab chiqarishini rivojlantirish, kooperatsiyani kuchaytirish, yangi texnologiyalarni o‘zlashtirish va og‘ir mashinasozlik mahsulotlarining raqobatbardoshligini oshirishga ko‘maklashishga qaratilgan.
Majlisda MDH mamlakatlari monopoliyaga qarshi organlarining ijtimoiy ahamiyatga ega tovarlar bozorlaridagi faoliyati to‘g‘risidagi ma’ruza tinglanib, soliq axborotini elektron shaklda almashish to‘g‘risidagi protokolning amalga oshirilishi haqidagi axborot ko‘rib chiqildi.
Iqtisodiy kengash, shuningdek, MDHning 2030-yilgacha bo‘lgan mintaqalararo va chegaraoldi hamkorligi konsepsiyasini amalga oshirish bo‘yicha chora-tadbirlar rejasiga o‘zgartirishlar kiritish, "Radionavigatsiya" davlatlararo kengashi to‘g‘risidagi nizomga o‘zgartirishlar kiritish, 2030-yilgacha yer qa’rini o‘rganish, foydalanish va muhofaza qilish bo‘yicha qo‘shma ishlarning istiqbolli rejasini amalga oshirish, Buxgalteriya hisobi bo‘yicha muvofiqlashtiruvchi kengash faoliyati to‘g‘risidagi hisobot, RnD Market texnologik platformasi va veterinariya sohasida qo‘llaniladigan dori vositalari sifatini nazorat qilish bo‘yicha kadrlar malakasini oshirish uchun tayanch tashkilot maqomini berish, shuningdek Qozog‘iston markaziga innovatsiyalarni tijoratlashtirish markazi maqomini berish masalalarini ko‘rib chiqdi.
Yig‘ilish ishtirokchilari "Uran qazib olish sanoati ta’siriga uchragan hududlarni rekultivatsiya qilish" Davlatlararo maqsadli dasturini amalga oshirish, shuningdek MDH organlarini moliyalashtirish, statistika, kichik va o‘rta tadbirkorlikni rivojlantirish, sug‘urta xizmatlari bozori va arxiv ishiga oid qator masalalarni muhokama qildilar.
MDH Iqtisodiy kengashining navbatdagi yig‘ilishi 2025-yil 18-iyul kuni Moskvada o‘tkazilishi rejalashtirilgan.
Eslatib o‘tamiz, kecha, 29-aprel kuni MDHga a’zo davlatlar hududlari forumining yalpi majlisida MDH Bosh kotibi Sergey Lebedev so‘zga chiqib, MDH hududlari forumini o‘tkazish tashabbusi O‘zbekiston Prezidenti Shavkat Mirziyoyevga tegishli ekanligini, u buni 2019-yilda bildirganini va 2023-yilda aniqlashtirganini ta’kidladi.
Bosh kotib mintaqalararo hamkorlik MDH oliy organlarining doimiy e’tibor markazida ekanini ta’kidladi. U mintaqaviy hamkorlikni rivojlantirish muhimligini aytib, hududlarni "iqtisodiy o‘sish lokomotivlari" deb atadi va ularning salohiyatini birlashtirish savdo aloqalarini kengaytirish, qo‘shilgan qiymat zanjirlarini yaratish va investitsiyalarni jalb qilishga yordam berishini qayd etdi.