Prezident Olmaliq shahridagi muhandislik maktabi faoliyati bilan tanishdi
Shavkat Mirziyoyev Toshkent viloyatining Olmaliq shahriga tashrif buyurdi. Bu shahar iqtisodiyotining asosini Olmaliq kon-metallurgiya kombinati tashkil etib, u ish o‘rinlari yaratish, infratuzilmani rivojlantirish, shuningdek, uy-joy va ta’lim muassasalarini qurish borasida muhim ahamiyatga ega.
Davlatimiz rahbari shahar hayotining barcha sohalariga ilmiy yondashuvlarni joriy etish va doimiy rivojlantirishning muhimligini ta’kidladi. Shu maqsadda Olmaliqda kadrlar faol tayyorlanmoqda: bu yerda Toshkent davlat texnika universiteti va Moskva po‘lat va qotishmalar institutining filiallari ochilgan. Yaqinda Olmaliq kombinatining muhandislik maktabi tashkil etilib, unda har yili 480 nafar muhandis ta’lim oladi, minglab xodimlar malaka oshiradi.
Maktabning o‘quv dasturi nemis mutaxassislari, xususan, Frayberg tog‘-kon akademiyasining ilg‘or uslublari asosida ishlab chiqilgan. Prezidentimiz maktab faoliyati bilan tanishib, yosh talabalar bilan suhbatlashdi hamda doimiy o‘z ustida ishlash va ishlab chiqarishga raqamli texnologiyalarni joriy etish zarurligini ta’kidladi.
Mirziyoyev kombinatda qurilayotgan mis boyitish fabrikasini ham borib ko‘rdi. U uchun mutaxassislar allaqachon tayyorlanmoqda: yuzdan ortiq yosh mutaxassis o‘qitilgan va sohada ish bilan ta’minlangan. Prezident ta’lim samaradorligini oshirish uchun nazariy bilimlarni amaliyot bilan uzviy bog‘lash kerakligini uqtirdi.
Ilgariroq, iyun oyida sanoat korxonalari bilan hamkorlikda ishlaydigan 10 ta muhandislik maktabini tashkil etishga qaror qilingan edi. Ushbu maktablarda talabalar chuqurlashtirilgan dastur asosida tahsil oladi, o‘qituvchilar esa xorijda malaka oshiradi.
Bogdan Burikin, atayin “Karavan-Info” uchun