Toshkentda yangi gastronomik ko‘cha ochiladi
Toshkentning Olmazor tumanida 7 kilometrlik yangi gastronomik ko‘cha barpo etiladi. Prezident 17 ta ko‘chani kesib o‘tuvchi 7,3 kilometrlik yo‘lni gurmanlarga va ko‘cha taomlari ishqibozlariga mo‘ljallangan mashhur maskanga aylantirish loyihasini ma’qulladi.
Mazkur ko‘cha bo‘ylab 250 ta savdo va xizmat ko‘rsatish obyekti ochilib, kamida 1,5 mingta ish o‘rni yaratilishi ko‘zda tutilmoqda. Loyiha xizmat ko‘rsatish sohasini rivojlantirish hamda tadbirkorlar uchun yangi imkoniyatlar yaratishga qaratilgan.
Bundan tashqari, poytaxt rahbariyati yana 26 ta ko‘chani kecha-yu kunduz gavjum hududlarga aylantirish, shuningdek, 24 soat ishlaydigan savdo shoxobchalari sonini mingtaga ko‘paytirish masalasini ko‘rib chiqmoqda.
Prezident shahar aholisi va mehmonlarining dam olishi hamda hordiq chiqarishi uchun ko‘proq imkoniyat yaratish maqsadida sayyohlik va xizmat ko‘rsatish obyektlarining kechki paytda ishlashi muhimligini ta’kidladi.