O‘zbek aktyori Husan Musaboyev vafot etdi
Mashhur o‘zbek aktyori va O‘zbekiston Kinoarboblari ijodiy uyushmasi a’zosi Husan Musaboyev 71 yoshida olamdan o‘tdi. Bu haqda tashkilot matbuot xizmati ma’lum qildi.
Musaboyev 1954-yil 10-iyunda Toshkentda tavallud topgan. 1976-yilda Toshkent teatr va tasviriy san’at institutini tugatib, kino va teatr aktyori ixtisosligini egallagan. Uning ijodiy faoliyati 1971-yildayoq O‘zbekiston teleradiokompaniyasida rejissyor yordamchisi sifatida boshlangan. Keyinchalik, 1976-1986-yillarda “Yosh gvardiya” teatrida, so‘ngra O‘zbek davlat satira teatrida nafaqat aktyor sifatida faoliyat yuritgan, balki truppa rahbari ham bo‘lgan.
Musaboyev 1998-2007-yillarda “O‘zbekiston” telekanalida, shuningdek, "Televizion miniatyuralar teatri"da aktyor, rejissyor yordamchisi va oliy toifali rejissyor lavozimlarida ishlagan. 2007-2016-yillarda esa Toshkent axborot texnologiyalari institutida ta’lim bergan.
Yorqin va iste’dodli aktyor o‘zbek kinematografiyasida “Ajoyib xayolparast”, “Bozor ko‘rmagan yigit”, “Anora”, “Hayot-mamot”, “Men bu men” va boshqa ko‘plab mashhur filmlarda rol ijro etib, chuqur iz qoldirdi.