Prezident Xalq qabulxonalari ishini tanqid qildi: "Ular dispetcherga aylanib qolgan."
O‘zbekistondagi Xalq qabulxonalari tizimi o‘zining asosiy vazifasini — fuqarolarning muammolarini hal qilishni to‘xtatdi. Bu haqda Prezident Shavkat Mirziyoyev yig‘ilishda aytib, qabulxonalar haqiqiy yordam o‘rniga murojaatlarni turli davlat idoralariga yo‘naltiradigan "dispetcher"larga aylanib qolganini ta’kidladi.
"O‘tgan yili virtual qabulxona va xalq qabulxonalariga yuborilgan murojaatlarning 55 foizi ijobiy hal etilmagan," - dedi Mirziyoyev.
Aynan shu holat, O‘zbekiston yetakchisining so‘zlariga ko‘ra, ijtimoiy tarmoqlar orqali shikoyatlar sonining ko‘payishiga sabab bo‘ldi. Odamlar davlat idoralaridan javob ololmagach, jamoatchilikka yordam so‘rab murojaat qilish holatlari ko‘paymoqda. Eng ko‘p shikoyatlar huquqni muhofaza qilish organlari, sud tizimi, hokimliklar, shuningdek, ta’lim va ekologiya sohalari bilan bog‘liq. Ayniqsa, mingga yaqin fuqaro to‘g‘ridan-to‘g‘ri prezident qabulida bo‘lishni so‘ragani xavotirli.
"Ayniqsa, Toshkent shahri va Buxoroda mansabdor shaxslar ustidan shikoyatlar ko‘payganini hokimlar qachon tahlil qilgan? Vazirlar va hokimlar murojaatlarga yechim bermasa, odamlar dodini kimga aytsin?" - deya ta’kidladi prezident.
Shavkat Mirziyoyev barcha darajadagi mutasaddilarni har bir murojaat ortida inson taqdiri, dardi va umidi borligini unutmaslikka chaqirdi. Xalq qabulxonalari tizimini tubdan qayta ko‘rib chiqish, fuqarolar muammolarini o‘z vaqtida va sifatli hal etishda rahbarlarning shaxsiy mas’uliyatini kuchaytirish bo‘yicha topshiriqlar berdi.
"Har bir murojaat ortida inson taqdiri, uning dardi va umidi turganini unutmasligimiz kerak!" - deya xulosa qildi davlat rahbari.