Prezident MDH rahbarlari uchrashuvida ishtirok etdi
Shavkat Mirziyoyev Sankt-Peterburgda bo‘lib o‘tgan MDH davlat rahbarlarining norasmiy uchrashuvida qatnashdi. Tadbirda Rossiya, Belarus, Qozog‘iston, Qirg‘iziston, Tojikiston va Turkmaniston rahbarlari ham hozir bo‘ldilar.
Uchrashuvda 2024-yildagi hamkorlik natijalari sarhisob qilindi va kelajakdagi ustuvor vazifalar muhokama etildi. Ishtirokchilar o‘zaro savdodagi mavjud to‘siqlarni bartaraf etib, ichki savdo va hamkorlikni kuchaytirish zarurligini ta’kidladilar.
Muhandislik maktablarini tashkil etish, internet texnologiyalarini rivojlantirish, katta hajmli ma’lumotlar sanoati, “yashil” energetika, tinch maqsadlardagi atom energiyasi va ijodiy iqtisodiyot kabi sohalardagi hamkorlik istiqbollariga alohida e’tibor qaratildi. Raqamli yechimlarni joriy etish masalalari ham ko‘rib chiqildi.
Rahbarlar mintaqa va xalqaro siyosatning dolzarb muammolarini, shuningdek, umumiy xavf va tahdidlarga qarshi kurashda hamkorlikni mustahkamlash yo‘llarini muhokama qildilar.