O‘zbekistonda “yashil” energetikani rivojlantirish uchun yangi chora-tadbirlar joriy etilmoqda
O‘zbekiston Vazirlar Mahkamasi energetika sohasiga oid me’yoriy-huquqiy hujjatlarga o‘zgartirishlar kiritdi. Islohotlar doirasida biznes uchun energiya resurslarini me’yoridan ortiq sarflash bo‘yicha oshirilgan koeffitsiyent qo‘llaniladigan chegara ko‘tarildi.
Asosiy tashabbuslardan biri qayta tiklanadigan energiya manbalaridan foydalanishni qo‘llab-quvvatlashni kengaytirish bo‘ldi. Endi fuqarolar va kompaniyalar “yashil” energiya ishlab chiqarish uskunalarini o‘rnatishda imtiyozli kreditlar va subsidiyalarga ega bo‘lishlari mumkin. Xususan, “yashil” kreditlar bo‘yicha foiz stavkasi limiti bekor qilindi. Ilgari bu stavka Markaziy bankning asosiy stavkasidan 1,5 barobardan ortiq bo‘lmasligi kerak edi.
“Yashil” iste’mol kreditiga kiritiladigan uskunalar ro‘yxati ham kengaytirildi. Quyosh panellari, suv isitgichlari va shamol generatorlaridan tashqari, kichik va mikro GESlar, biogaz generatorlari, issiqlik nasoslarini o‘rnatish, shuningdek, qurilish izolyatsiya materiallari va energiya tejamkor maishiy gaz qozonlarini sotib olish uchun ham mablag‘ olish mumkin bo‘ldi.
Quyosh panellarini xarid qilish uchun foizsiz bo‘lib to‘lash shartlari ham yaxshilandi. Avvallari 5 kVtgacha quvvatga ega qurilmalar uchun bo‘lib to‘lash joriy etilgan bo‘lsa, endi bu chegara 20 kVtgacha oshirildi. Bunda garov sifatida mol-mulkdan ham, sug‘urta polisidan ham foydalanish mumkin.
Tarmoqlararo energiya tejash jamg‘armasi platformasiga mahalliy qayta tiklanuvchi energiya uskunalari ishlab chiqaruvchilarining takliflarini joylashtirish rejalashtirilmoqda. Savdo agentlari va dilerlar ham o‘z takliflarini e’lon qilish imkoniga ega bo‘lishadi.