O‘zbekistonda "Vazirlar Mahkamasi kubogi" kibersport turnirining final bosqichi o‘tkazildi
Mamlakatimizda kibersportni rivojlantirish va ommalashtirish to‘g‘risidagi Prezident farmonini amalga oshirish doirasida “O‘zbekiston Respublikasi Vazirlar Mahkamasi kubogi” turnirining yakuniy musobaqalari bo‘lib o‘tdi. Tadbir kibersportni targ‘ib qilish, iqtidorli yoshlarni aniqlash va IT sohasini qo‘llab-quvvatlashga qaratilgan.
Turnirni Raqamli texnologiyalar vazirligi, Sport vazirligi, Elektron kompyuter sporti federatsiyasi hamda Kibersport uyushmasi tashkil etdi. Final bosqichida uchta yo‘nalish bo‘yicha eng kuchli jamoalar to‘plandi: CS:GO (Counter-Strike 2), PUBG Mobile va Mobile Legends: Bang Bang. Umumiy sovrin jamg‘armasi 150 million so‘mni tashkil etib, g‘olib va sovrindorlarni mukofotlash imkonini berdi.
CS:GO yo‘nalishida Toshkent viloyatining “Alanga” jamoasi birinchi o‘rinni egalladi. Toshkentlik “NOT X UWW TDM” jamoasi PUBG Mobile bo‘yicha turnir g‘olibi bo‘ldi. Mobile Legends: Bang Bang yo‘nalishida esa Toshkentning “Yetti cho‘qqi” jamoasi g‘alabani qo‘lga kiritdi.