O‘zbekiston delegatsiyasi Barqaror rivojlanish bo‘yicha Parlament komissiyasi yig‘ilishida ishtirok etdi
Oliy Majlis Senatining Mudofaa va xavfsizlik masalalari qo‘mitasi raisi Qutbiddin Burxonov boshchiligidagi delegatsiya Qozog‘iston Parlament komissiyasining Markaziy Osiyoni barqaror rivojlantirish masalalariga bag‘ishlangan kengaytirilgan majlisida qatnashdi. Tadbir Ostonada o‘tkazilib, unda mintaqa davlatlari parlamentariylari, xalqaro tashkilotlar vakillari va mutaxassislar ishtirok etdilar.
Yig‘ilishda barqaror taraqqiyotga erishishda parlamentlar va mahalliy hokimiyat organlarining o‘rni muhokama qilindi. O‘zbekistonning bu yo‘nalishdagi sa’y-harakatlariga alohida e’tibor qaratildi. Barqaror rivojlanish bo‘yicha milliy maqsadlarning bajarilishini nazorat qiluvchi hamda mamlakatning global ustuvorliklarni milliy kun tartibiga singdirishdagi yutuqlarini kuzatib boruvchi O‘zbekiston Parlament komissiyasining faoliyati ijobiy baholandi.
Asosiy mavzulardan biri ekologik muammolar, jumladan iqlim o‘zgarishi, suv resurslari masalalari, cho‘llanish va suv-energetika xavfsizligini ta’minlash bo‘ldi. Ishtirokchilar ushbu masalalarni hal etish uchun parlamentlararo hamkorlikni mustahkamlash va tajriba almashishning muhimligini ta’kidladilar.
Yig‘ilish yakunida mintaqani uyg‘un va muvozanatli rivojlantirish maqsadida hamkorlikni kengaytirishga kelishib olindi. Shuningdek, joylarda tashabbuslarni samarali amalga oshirishda mahalliy vakillik organlarining muhim o‘rni alohida qayd etildi.