Adliya vazirligi o‘zboshimchalik bilan egallangan yer uchastkalarini qonuniylashtirish tartibini tushuntirdi
Adliya vazirligi tashkil etgan matbuot anjumanida vazir o‘rinbosari Alisher Karimov fuqarolarning o‘zboshimchalik bilan egallab olingan yer uchastkalari va ularda qurilgan uylarga bo‘lgan huquqlarini tartibga soluvchi yangi qonun haqida ma’lumot berdi.
5 avgust kuni qabul qilingan qonun 8 noyabrdan kuchga kirdi. Uning maqsadi ilgari hujjatlari bo‘lmagan qurilmalarni qonuniylashtirish va fuqarolarning bunday obyektlarga bo‘lgan huquqlarini himoya qilishdan iborat.
Yangi qonun bunday uchastkalar va binolarga bo‘lgan huquqlarni tan olish imkonini beruvchi sakkizta holatni qamrab oladi. Xususan, bu 2018 yil maygacha egallangan yerlar, dastlab belgilangan chegaralardan oshib ketgan uchastkalar, shuningdek, ilgari huquqlarni rasmiylashtirishga urinilgan, ammo jarayon yakunlanmagan obyektlarga taalluqlidir. Qonuniylashtirish 2021 yil iyunigacha mahalliy hokimiyat tomonidan ajratilgan, biroq viloyat darajasida tasdiqlanmagan yerlarni, bog‘dorchilik va uzumchilik shirkatlari uchastkalarini, kichik sanoat zonalaridagi yer uchastkalarini, shuningdek, xususiylashtirilgan bino va inshootlarni ham qamrab oladi. Bundan tashqari, qonun hokimlarning qarorlari bilan qonuniylashtirilgan yer va binolarga bo‘lgan huquqlarni ham tan oladi.
Shuningdek, Adliya vazirligi fuqarolarni bunday uchastkalarga hujjatlarni rasmiylashtirish uchun pullik xizmatlarni taklif qilishi mumkin bo‘lgan firibgarlardan ogohlantirib o‘tdi. O‘z mahallalarida inventarizatsiya rejasini diqqat bilan kuzatib borish, tekshiruv vaqtida hujjatlarni taqdim etish, qarzdorlik mavjud bo‘lsa, yer va mol-mulk soliqlarini to‘lash muhimdir.