O‘zbekistonda “Eng yaxshi ijtimoiy tashabbus” tanlovi g‘oliblari taqdirlandi
Oliy Majlis Senati tomonidan tashkil etilgan “Eng yaxshi ijtimoiy tashabbus” tanlovining respublika bosqichi doirasida g‘oliblarni taqdirlash marosimi bo‘lib o‘tdi. Tanlovning asosiy maqsadi davlat tuzilmalari, nodavlat tashkilotlar va fuqarolar tomonidan amalga oshirilayotgan ijtimoiy tashabbuslarni qo‘llab-quvvatlash va rag‘batlantirishdir.
Respublika komissiyasi ijtimoiy rivojlanish sohasida yuqori natijalarga erishgan 12 hududdan kelgan 50 ishtirokchi orasidan g‘oliblarni aniqladi. G‘oliblar beshta nominatsiya bo‘yicha tanlandi.
“Eng yaxshi ijtimoiy tashabbuskor tadbirkorlik subyekti” nominatsiyasida birinchi o‘rinni Jizzax viloyatining Paxtakor tumanidagi “Semurg‘” urug‘chilik klasteri, ikkinchi o‘rinni Buxorodagi “Axmedov Avtogaz Service” kompaniyasi, uchinchi o‘rinni Toshkent viloyatining Bekobod shahridagi “XOJI-ZUXRA-ONA” oilaviy korxonasi egalladi.
Eng yaxshi ijtimoiy tashabbuskor nodavlat tashkilot sifatida Buxoro tumanidagi Nogironlar jamiyati bo‘limi tan olindi. Ushbu nominatsiyada ikkinchi o‘rinni Jizzaxdagi “Istikbolli avlod” ijtimoiy-axborot markazi, uchinchi o‘rinni Navoiydagi “Lider” ayollar va bolalar markazi oldi.
Davlat idoralari bo‘yicha birinchi o‘rin Nukusdagi “Inson” ijtimoiy xizmatlar markaziga nasib etdi, ikkinchi o‘rin Samarqand viloyatidagi bolalar ko‘p tarmoqli tibbiyot markaziga, uchinchi o‘rin esa Sirdaryo viloyatining Boyovut tumanidagi Yoshlar agentligi bo‘limiga berildi.
“Eng yaxshi ijtimoiy tashabbuskor fuqaro” nominatsiyasida birinchi o‘rin Sirdaryo viloyatidan Adhamjon Jo‘rayevga, ikkinchi o‘rin Xorazmdan Ravshanbek Sobirovga, uchinchi o‘rin esa Namangandan Muhammadali Qambarovga topshirildi.
Hokimliklar orasida birinchi o‘rinni Samarqand viloyatining Ishtixon tumani hokimligi, ikkinchi o‘rinni Andijon viloyatining Bo‘ston tumani hokimligi, uchinchi o‘rinni esa Qashqadaryo viloyatining Qarshi shahri hokimligi egalladi.