Senat a’zolari “Jadidlar izidan” tanlovi ishtirokchilari bilan uchrashdi
Toshkentda Oliy Majlis Senatining Fan, ta’lim va sog‘liqni saqlash masalalari qo‘mitasi a’zolari maktab o‘quvchilari uchun tashkil etilgan “Jadidlar izidan” respublika tanlovi ishtirokchilari bilan uchrashdi. Uchrashuvda ta’lim sohasidagi islohotlar, yoshlarga yaratilgan imkoniyatlar va bu o‘zgarishlar natijasida erishilgan yutuqlar muhokama qilindi.
Ta’lim muassasalarida zamonaviy shart-sharoitlar yaratishga alohida e’tibor qaratildi. Yangi kompyuter va laboratoriya xonalari, sport zallari hamda boshqa infratuzilma obyektlari o‘quvchilarga o‘z iqtidorlarini namoyon etish va turli tanlovlarda, nafaqat respublika, balki xalqaro miqyosda ham sovrinli o‘rinlarni egallash imkonini bermoqda.
Tanlov ishtirokchilari senatorlarga savollar berish va Senat faoliyati haqida batafsil ma’lumot olish imkoniyatiga ega bo‘ldilar.
“Jadidlar izidan” tanlovi Maktabgacha va maktab ta’limi vazirligi tomonidan maktab o‘quvchilarida mustaqil fikrlash ko‘nikmalarini rivojlantirish va O‘zbekistonning boy ma’naviy merosini ommalashtirish maqsadida o‘tkazilmoqda. Joriy yilda tanlovda ishtirok etish uchun 364 mingdan ortiq ariza topshirildi.
Tanlovning final bosqichi 18-21 dekabr kunlari Toshkent shahrida bo‘lib o‘tadi. Eng yuqori ball to‘plagan g‘oliblar xorijga ta’lim safarida ishtirok etish huquqini qo‘lga kiritadilar.