Rossiya va O‘zbekiston: 33 yillik do‘stlik va strategik sheriklik
Bugun, 2025-yil 20-mart kuni Rossiya Federatsiyasi va O‘zbekiston Respublikasi o‘rtasida diplomatik munosabatlar o‘rnatilganiga 33 yil to‘ldi. O‘tgan yillar davomida do‘stlik va yaxshi qo‘shnichilik rishtalari bilan bog‘langan mamlakatlar o‘rtasida teng huquqlilik, o‘zaro hurmat va milliy manfaatlarni hisobga olish tamoyillariga asoslangan mustahkam strategik sheriklik va ittifoqchilik munosabatlari o‘rnatildi.
Harbiy-siyosiy, savdo-iqtisodiy va gumanitar sohalardagi hamkorlikning ustuvor yo‘nalishlarini belgilab beruvchi Ittifoqchilik munosabatlari to‘g‘risidagi shartnoma va Strategik sheriklik to‘g‘risidagi shartnoma Rossiya-O‘zbekiston hamkorligining mustahkam poydevori bo‘lib xizmat qilmoqda.
Rossiyaning O‘zbekistondagi Favqulodda va muxtor elchisi Oleg Malginov yubiley munosabati bilan bergan izohida Prezidentlar Vladimir Putin va Shavkat Mirziyoyev o‘rtasidagi ishonchli muloqot va pozitsiyalarning yaqinligi tufayli ikki mamlakat o‘rtasidagi munosabatlar barcha sohalarda jadal rivojlanishda davom etayotganini ta’kidladi.
Savdo-iqtisodiy hamkorlikda ijobiy dinamika kuzatilmoqda: O‘zbekiston MDH makonida Rossiyaning asosiy sherigi bo‘lib qolmoqda. O‘zaro investitsiyalar hajmi ortmoqda, sanoat kooperatsiyasi kengaymoqda. Iqtisodiy aloqalarni rivojlantirishda muvofiqlashtiruvchi rolni Iqtisodiy hamkorlik bo‘yicha hukumatlararo komissiya o‘ynaydi.
Gumanitar hamkorlik muhim o‘rin tutadi. O‘zbekistonda Rossiya oliy ta’limiga doimo talab bor (Rossiya oliy o‘quv yurtlarida 60 mingdan ortiq o‘zbekistonlik talaba tahsil oladi). Madaniy-gumanitar sohada hamkorlik dasturi amal qilmoqda.
Umumiy tarixga, xususan, O‘zbekistonning Ulug‘ Vatan urushidagi g‘alabaga qo‘shgan hissasiga alohida e’tibor qaratilgan.
“Birgalikdagi tarixiy o‘tmish ikki davlat munosabatlarida qizil ip bo‘lib o‘tadi. Ulug‘ Vatan urushi yillarida O‘zbekiston frontni oziq-ovqat, xom ashyo va sanoat mahsulotlari bilan ta’minlabgina qolmay, frontga yuz minglab o‘g‘il-qizlarini jo‘natdi.”
Elchi Shavkat Mirziyoyevning sovet xalqi jasoratini abadiylashtirishdagi shaxsiy hissasini yuqori baholab, “G‘alaba bog‘i” yodgorlik majmuasi tashkil etilganini ta’kidladi. 2025-yil G‘alabaning 80-yilligi, natsizmga qarshi kurashda tinchlik va birdamlik yili deb e’lon qilindi va har ikki davlat qahramonlar xotirasini asrab-avaylashni o‘z burchi deb biladi.
Rossiya va O‘zbekiston xalqaro maydonlarda, MDH, SHHT, YeOII va BRIKS doirasida faol hamkorlik qilmoqda.
Ikki mamlakat hukumatlari oldida Vladimir Putinning 2024-yil may oyida Toshkentga davlat tashrifi chog‘ida erishilgan kelishuvlarni amalga oshirish bo‘yicha keng ko‘lamli vazifalar turibdi.
Rossiya elchisi Rossiya va O‘zbekiston hamkorlikni mustahkamlashda davom etishiga ishonch bildirdi:
“Ishonchim komilki, Rossiya va O‘zbekiston mavjud salohiyatdan foydalangan holda qo‘shma rejalarni amalga oshirish, mintaqalararo hamkorlikni mustahkamlashda davom etadi. Iqtisodiy o‘sish va xalqlarimizning hayot sifatini oshirish uchun birgalikda imkoniyatlar yaratishni davom ettirish muhimdir.”
Eslatib o‘tamiz, Rossiyaning O‘zbekistondagi Favqulodda va muxtor elchisi o‘tgan oyda eksklyuziv intervyu bergan edi, uni bu yerda o‘qishingiz mumkin.