O‘zbekistonda ayollar uchun onkoskrinig tizimi takomillashmoqda
O‘zbekistonda ayollar salomatligini muhofaza qilish tizimini yaxshilash bo‘yicha yangi chora-tadbirlar ko‘rilmoqda. Ilg‘or xalqaro tajribani hisobga olgan holda onalik va bolalik sohasida amalga oshirilayotgan islohotlar doirasida Prezident ‘Ayollar o‘rtasida onkologik kasalliklarni nazorat qilish tizimini takomillashtirish chora-tadbirlari to‘g‘risida‘gi qarorni imzoladi.
Ushbu hujjat asosida Sog‘liqni saqlash vazirligi tibbiy yordamni takomillashtirish bo‘yicha asosiy vazifalarni o‘z ichiga olgan harakatlar rejasini tasdiqladi. Eng muhim tashabbuslardan biri 30 yoshdan 65 yoshgacha bo‘lgan ayollarning elektron ma’lumotlar bazasini yaratish, shuningdek, ularni muntazam tibbiy ko‘riklarga taklif etish tizimini ishlab chiqish bo‘ldi.
30-50 yoshdagi ayollar har yili PZR va suyuqlik sitologiyasi orqali odam papillomasi virusini aniqlash kabi zamonaviy diagnostika usullaridan foydalangan holda bachadon bo‘yni saratoni skriningidan o‘tadilar. Natija salbiy bo‘lsa, tekshiruv 10 yildan so‘ng takrorlanadi, ijobiy bo‘lsa — bemor qo‘shimcha tekshiruvga yuboriladi.
Saraton oldi holati aniqlangan ayollar ixtisoslashtirilgan tibbiyot markazlarida, jumladan Respublika ona va bola salomatligi ilmiy-amaliy markazi hamda uning filiallarida ambulator davolanishadi. Shuningdek, dastur doirasida har ikki yilda bir marta 30-65 yoshdagi ayollar muntazam skriningdan o‘tkaziladi.
Ko‘krak bezi saratoni tashxisi yoshga qarab tashkil etilgan: 45 yoshgacha bo‘lgan ayollar uchun ultratovush tekshiruvi, 45 yoshdan oshgan bemorlar uchun esa mammografiya qo‘llaniladi.
Skrining natijasida aniqlangan onkologik kasalliklarni tashxislash va davolash xarajatlari davlat byudjeti mablag‘lari hisobidan qoplanadi.