O‘zbekistonda dori-darmonlar narxini belgilash qoidalari o‘zgaradi
O‘zbekistonda 1-apreldan boshlab retseptsiz dori vositalari va tibbiy buyumlarga qo‘yilgan narx chegaralari bekor qilinadi. Bu farmatsevtika sohasini jadal rivojlantirishga qaratilgan prezident farmonida ko‘zda tutilgan. Bundan buyon, savdo ustamasi bo‘yicha cheklovlar faqat retsept bilan beriladigan dori vositalari uchun saqlanib qoladi.
2017 yildan beri dorixonalar uchun 20 foiz, distribyutorlar uchun 15 foiz va ijtimoiy ahamiyatga ega dori vositalari uchun 10 foizdan oshmaydigan ustamalar belgilangan edi. Ammo yangi choralar bozorga retseptsiz dori vositalarining narxini mustaqil tartibga solish imkonini beradi. Bu esa, hukumat fikriga ko‘ra, raqobatni rivojlantirish va dori-darmonlarning hammabopligini oshirish uchun sharoit yaratadi.
Muhim yangiliklardan biri referent narxlash tizimi bo‘ladi. Agar ishlab chiqaruvchi bir xil tarkibli, ammo turli savdo nomlari ostidagi bir nechta dori vositalarini ishlab chiqarayotgan bo‘lsa, ularga ro‘yxatga olingan eng past narx qo‘llaniladi. Tartibga soluvchi organlar dori vositalarining shakli, dozasi va qadoqlanishini hisobga olgan holda ularning eng yuqori narxlarini nazorat qilib boradi.
Bundan tashqari, dori vositalarini mamlakatga yetkazib berish va mahalliy farmatsevtika ishlab chiqaruvchilari tomonidan mahsulot sotish belgilangan referent narxdan yuqori bo‘lishi mumkin emas. Farmatsevtika mahsulotlari xavfsizligi markazi chet el valyutasida ro‘yxatga olingan narxlarni avtomatik ravishda qayta ko‘rib chiqadi, bu esa tadbirkorlarga qo‘shimcha so‘rovlar yuborish zaruratini bartaraf etadi.