Shavkat Mirziyoyev Suma Chakrabarti bilan uchrashdi
O‘zbekiston Prezidenti iqtisodiy rivojlanish, samarali boshqaruv va xalqaro hamkorlik bo‘yicha maslahatchi Suma Chakrabarti bilan uchrashuv o‘tkazdi. Asosiy e’tibor joriy yilgi Davlat dasturi doirasida “O‘zbekiston — 2030” strategiyasini amalga oshirish va kelgusi yilda islohotlarni ilgari surish rejalariga qaratildi.
Uchrashuvda davlat organlari uchun kadrlar tayyorlash va ularning malakasini oshirish masalalari muhokama qilindi. Bu chora-tadbirlar islohotlarni muvaffaqiyatli joriy etish va davlat boshqaruvi samaradorligini oshirishning muhim omillari sifatida baholandi.
O‘zbekistonning Jahon savdo tashkilotiga a’zo bo‘lish yo‘lidagi harakatlari muhim mavzu bo‘ldi. Prezident milliy qonunchilikni JST me’yorlari va talablariga tezkor moslashtirish, shuningdek, mamlakatning xalqaro reytinglardagi o‘rnini yaxshilash bo‘yicha ishlarni davom ettirish zarurligini ta’kidladi.
Mirziyoyev barcha joriy loyihalarni amalga oshirish muhimligini qayd etib, strategik kun tartibini yangi tashabbuslar bilan boyitish zarurligini alohida ta’kidladi. U mamlakatda e’lon qilingan Atrof-muhitni muhofaza qilish va “yashil” iqtisodiyot yili bilan bog‘liq vazifalarga alohida e’tibor qaratdi.