Shavkat Mirziyoyev Xushnud mahallasiga tashrif buyurdi
Mahalla 2021 yilda tashkil etilgan bo‘lib, bugungi kunda obodonlashtirishga zamonaviy yondashuvning namunasi hisoblanadi. Bu yerda 48 ta ko‘p qavatli uy va 625 ta xonadondan iborat 11 mingdan ziyod aholi istiqomat qiladi.
Ilgari bu hudud shahar chekkasi hisoblangan. 2018-yildan boshlab tumanda faol qurilish ishlari boshlandi: zamonaviy uylar, bolalar va sport maydonchalari barpo etildi, ko‘chalar va hovlilar obodonlashtirildi. Joriy yilda mahallada uch qavatli bino qurilib, birinchi qavatda rais xonasi, kutubxona va jadidlar burchagi, yuqori qavatlarda esa aniq fanlar va xorijiy tillar o‘quv markazi, fitnes zali hamda yoshlarni kasbga yo‘naltirish monomarkazi joylashtirildi.
Prezidentimiz mahalla oqsoqollari va faollari bilan suhbatlashdi. Ular so‘nggi yillarda tuman sezilarli darajada o‘zgarganini ta’kidlashdi. Yangi korxonalar va infratuzilma obyektlari qurilishi natijasida ijtimoiy-iqtisodiy hayot jonlandi.
Shavkat Mirziyoyev bunday tashriflardan maqsad qabul qilingan qarorlar qanday amalga oshirilayotgani va bu odamlar hayotiga qanday ta’sir ko‘rsatayotganini ko‘rish ekanini ta’kidladi. Prezident bunday o‘zgarishlar har bir hududda amalga oshirilishi, bunda ish o‘rinlari yaratish, ta’lim, madaniyat va ma’naviyatni rivojlantirishga alohida e’tibor qaratilishini aytib o‘tdi.
Davlatimiz rahbari yangi 16 qavatli uyning dastlabki ikki qavatida joylashgan 150 o‘rinli xususiy bolalar bog‘chasiga alohida e’tibor qaratdi. Muassasa zamonaviy dizayn va milliy an’analar uyg‘unligida qurilgan bo‘lib, bolalar uchun qulay sharoit yaratilgan.
Mahallada istiqomat qiluvchi yosh bolali ayollar uchun tikuvchilik va qandolatchilik sohalarida ish o‘rinlari tashkil etilmoqda. Yangi bolalar bog‘chasi ularning hayotini sezilarli darajada yengillashtiradi, ish va oila yumushlarini muvaffaqiyatli uyg‘unlashtirishga imkon beradi.