O‘zbekiston delegatsiyasi MDH Parlamentlararo Assambleyasining 57-sessiyasida ishtirok etdi
Oliy Majlis Senati Raisi Tanzila Narbayeva boshchiligidagi O‘zbekiston parlament delegatsiyasi Sankt-Peterburgda bo‘lib o‘tgan MDH Parlamentlararo Assambleyasining 57-sessiyasida qatnashdi.
Narbayeva o‘z nutqida O‘zbekiston tomonidan ishlab chiqilgan tashabbuslarni taqdim etib, MDH davlatlari o‘rtasidagi hamkorlikni mustahkamlash muhimligini ta’kidladi.
Sessiyaning asosiy mavzusi saylov jarayonlarini xalqaro kuzatishning demokratiya rivojlanishidagi o‘rnini muhokama qilish bo‘ldi. Ishtirokchilar MDH Parlamentlararo Assambleyasining demokratik qadriyatlarni ilgari surish, parlamentarizm va fuqarolik jamiyati institutlarini mustahkamlash, shuningdek, davlatlar o‘rtasidagi birdamlikni rivojlantirishda muhim ahamiyatga ega ekanligini qayd etdilar.
Assambleya kuzatuv missiyalari o‘z faoliyati davomida 100 dan ortiq saylov kampaniyalarini kuzatishda ishtirok etdi. Ularning ishida O‘zbekiston parlamenti a’zolari ham faol qatnashmoqda. O‘zbekiston Prezidenti tashabbusi bilan tashkil etilgan Saylov organlari rahbarlarining Maslahat kengashi faoliyati alohida e’tirof etildi.
O‘zbekiston delegatsiyasi majlisda qabul qilingan namunaviy qonunlar va tavsiyalarni qo‘llab-quvvatladi. Ushbu hujjatlar ko‘p tomonlama hamkorlikni mustahkamlashga qaratilgan bo‘lib, O‘zbekiston manfaatlarini aks ettiradi, qonunchilikni takomillashtirish va MDH mamlakatlari o‘rtasidagi hamkorlikni kuchaytirish uchun xizmat qiladi.