O‘zbekistonda aholining raqamli savodxonlik darajasi o‘rganilmoqda
Shveysariya taraqqiyot va hamkorlik agentligi O‘zbekiston aholisining raqamli savodxonlik darajasini tadqiq etish uchun 2 milliard so‘m (taxminan 149,6 ming AQSH dollari) mablag‘ ajratdi. Ushbu mablag‘lar mamlakatda IT-ta’lim va raqamli ko‘nikmalarni rivojlantirishga qaratilgan loyiha doirasida IT-ta’lim uyushmasiga o‘tkazildi. Bu borada Shveysariyaning O‘zbekistondagi elchixonasi, Shveysariya agentligi va IT-ta’lim uyushmasi o‘rtasida kelishuv imzolandi.
Loyiha aholi o‘rtasida raqamli ko‘nikmalarning hozirgi holatini tahlil qilish, shuningdek, bozor talablariga mos keladigan yangi kasblarni aniqlashdan boshlanadi. IT sohasidagi ta’lim resurslarini birlashtiruvchi onlayn platforma yaratish ishning muhim qismi hisoblanadi. Bilim va ko‘nikmalardagi kamchiliklarni aniqlashga alohida e’tibor qaratiladi, bunda yoshlar, qishloq aholisi, ayollar va qizlar, shuningdek, kam ta’minlangan oilalar va nogironligi bo‘lgan shaxslar asosiy maqsadli auditoriya bo‘ladi.