Toshkent viloyatida YTH sonini kamaytirish uchun kartondan yasalgan odamlar o‘rnatiladi
Toshkent viloyatidagi avtomagistrallarda tungi paytlarda piyodalar ishtirokidagi YTHlarning oldini olish maqsadida yorug‘likni qaytaruvchi odam modellarini o‘rnatish boshlandi. Bu qaror tartibga solinmagan piyodalar o‘tish joylarida va yo‘llarning xavfli qismlarida YTH ko‘p sodir bo‘ladigan joylarni tahlil qilish asosida qabul qilindi.
Yo‘l harakati xavfsizligi boshqarmasining ma’lum qilishicha, haydovchilar bunday figuralarni ko‘rganda, ularni haqiqiy piyodalar deb o‘ylab, beixtiyor tormoz berishar ekan. Bu modellarning asosiy xususiyati — yorug‘likni qaytaruvchi yuzasi bo‘lib, u tufayli ular qorong‘i paytda yaxshi ko‘rinadi. Ushbu psixologik usul, ayniqsa svetofor va piyodalar o‘tish joylari bo‘lmagan hududlarda, avariyalar sonini kamaytirishga qaratilgan. Maketlar piyodalar bilan to‘qnashuvlar eng ko‘p sodir bo‘ladigan muammoli joylarga o‘rnatilgan.