O‘zbekistonda nogironligi bo‘lgan shaxslar uchun sportni individual tanlash tizimi ishlab chiqilmoqda
Parasportning 19 turi bilan shug‘ullanish uchun sharoitlar yaratilgan bo‘lib, ularda 25 mingga yaqin imkoniyati cheklangan shaxs ishtirok etmoqda. Rejada dasturni kengaytirish, davlat maktablarida adaptiv sport to‘garaklarini tashkil etish va sport maydonchalarini nogironlar ehtiyojlari uchun jihozlash ko‘zda tutilgan.
Asosiy qadamlardan biri “ERP-sport” elektron tizimini joriy etish bo‘lib, u nogironligi bo‘lgan shaxslarning ehtiyojlarini hisobga olish va ular uchun eng mos sport turlarini tanlashga yordam beradi. Bundan tashqari, reabilitatsiya markazlarida jismoniy terapiya va mexanoterapiya kabi reabilitatsiyaning eng zamonaviy usullaridan foydalanishni kuchaytirish rejalashtirilmoqda.
Adaptiv jismoniy tarbiya va sport sohasida mutaxassislar tayyorlashga, shuningdek xalqaro musobaqalar g‘oliblari va ularning murabbiylarini moddiy rag‘batlantirish tizimini joriy etishga alohida e’tibor qaratiladi.
Davlat rahbari qonunchilikni takomillashtirish va nogironligi bo‘lgan shaxslarni qo‘llab-quvvatlash uchun qo‘shimcha shart-sharoitlar yaratish zarurligini ta’kidladi.