Senat ‘Kosmik faoliyat to‘g‘risida"gi qonunni ma’qulladi
Oliy Majlis Senatining yalpi majlisida ‘Kosmik faoliyat to‘g‘risida‘gi qonun ko‘rib chiqilib, ma’qullandi. Hujjat ushbu sohadagi davlat siyosatining asoslarini belgilab, asosiy tushunchalarni, ish yo‘nalishlarini va hokimiyat organlarining vakolatlarini aniqlashtiradi.
Qonun Vazirlar Mahkamasi, Raqamli texnologiyalar vazirligi, Kosmik tadqiqotlar va texnologiyalar agentligi hamda Mudofaa vazirligi faoliyatini tartibga soladi. Ilmiy tadqiqotlar, kosmik aloqa, navigatsiya va monitoring tizimlarini rivojlantirish, raketa komplekslari va kosmodromlardan foydalanish, shuningdek, kosmik obyektlarni utilizatsiya qilish masalalariga alohida e’tibor qaratilgan.
Hujjat, shuningdek, kosmik faoliyatning atrof-muhit va aholi salomatligiga ta’sirini nazorat qilishni ham ko‘zda tutadi. Xalqaro hamkorlik va kosmik loyihalarni moliyalashtirish masalalari muhim o‘rin egallaydi.
Senatorlar ta’kidlaganidek, qonunning qabul qilinishi kosmik sohani rivojlantirish uchun huquqiy kafolatlar yaratib, yuzaga kelishi mumkin bo‘lgan xavf-xatarlarning oldini oladi hamda atrof-muhitni muhofaza qilish va mamlakatning mudofaa qobiliyatini mustahkamlaydi. Yangi qoidalar kosmik texnologiyalarni iqtisodiyotga, jumladan, yer munosabatlari, geologiya, transport, qishloq va o‘rmon xo‘jaligiga joriy etishga ko‘maklashadi.