“O‘zbekkosmos” ikki mingga yaqin noqonuniy axlatxonani aniqladi
Ekologiya sohasidagi agentlik tomonidan o‘tkazilgan kosmik kuzatuv natijasida joriy yilda O‘zbekiston hududida umumiy maydoni 721 gektarga yaqin bo‘lgan 1928 ta noqonuniy chiqindixona aniqlangan. Shundan 255,5 gektar maydondagi 123 ta chiqindixona chiqindi saqlash poligonlaridan tashqarida joylashgan bo‘lsa, 465,2 gektar maydonni egallagan 1805 ta chiqindixona noqonuniy poligonlar sifatida qayd etilgan.
Eng ko‘p chiqindixona Toshkent viloyatida — 98,6 gektar maydondagi 363 ta obyektda aniqlandi. Navoiy viloyatida 216 ta (112,4 gektar), Qoraqalpog‘istonda esa 243 ta (63,2 gektar) chiqindixona qayd etilgan. Boshqa hududlarda ham ekologiyaga jiddiy zarar yetkazuvchi o‘nlab shunday obyektlar aniqlangan.
Noqonuniy chiqindixonalar atrof-muhit va aholi sog‘lig‘iga xavf tug‘diradi. Ular tuproq, suv va havo sifatini yomonlashtiradi, zararli hasharotlar ko‘payishiga va yuqumli kasalliklar tarqalishiga sabab bo‘ladi. Bundan tashqari, bunday obyektlarning mavjudligi saraton va nafas olish tizimi kasalliklari xavfini oshiradi.