Senatda mahalliy Kengashlar faoliyatini takomillashtirish bo‘yicha seminar o‘tkazildi
Senatning Yoshlar, madaniyat va sport masalalari qo‘mitasi mahalliy Kengashlarning yoshlar siyosati, madaniyat va sport sohalari bilan shug‘ullanuvchi doimiy komissiyalari a’zolari uchun seminar tashkil etdi. Tadbirda senatorlar, mutaxassislar, deputatlar, Yoshlar parlamenti vakillari hamda mahalliy hokimiyat organlari xodimlari ishtirok etdilar.
Seminarning bosh maqsadi komissiyalar faoliyati samaradorligini oshirish, ularning Senat qo‘mitasi va ijro hokimiyati organlari bilan hamkorligini mustahkamlash, shuningdek, mahalliy tuzilmalar faoliyati ustidan nazoratni kuchaytirish edi. Qonunlarni deputatlar ishtirokida muhokama qilish va har bir hududning o‘ziga xos xususiyatlarini inobatga olish masalalariga alohida e’tibor qaratildi.
Muhokamalar davomida ishtirokchilar Prezident tomonidan Senatning birinchi yalpi majlisida belgilab berilgan vazifalar ustida to‘xtaldilar. Xususan, mahalliy Kengashlarning ilg‘or ish tajribasini joriy etish, so‘rov va tekshiruv kabi mexanizmlardan foydalanish orqali ularning rolini kuchaytirish muhimligi ta’kidlandi.
Komissiyalarning ishini yengillashtirish maqsadida Senat tomonidan ishlab chiqilgan uslubiy qo‘llanma taqdim etildi. Ushbu qo‘llanma faoliyatni rejalashtirish, muhokamalar o‘tkazish va sezilarli natijalarga erishish uchun amaliy tavsiyalarni o‘z ichiga oladi.
Seminarda Madaniyat, sport vazirliklari va Yoshlar ishlari agentligi vakillari so‘zga chiqdilar. Ular mahalliy hokimiyat organlarining doimiy komissiyalar bilan hamkorligi va hududlardagi dolzarb muammolarni hal etish yuzasidan tavsiyalar berdilar.