Senat mahalliy hokimiyat organlari faoliyati samaradorligini oshirish masalalarini muhokama qildi
Senatning Sud-huquq masalalari va korrupsiyaga qarshi kurashish hamda Mudofaa va xavfsizlik masalalari qo‘mitalari viloyat va Toshkent shahar, tuman va shahar Kengashlarining doimiy komissiyalari uchun o‘quv seminari o‘tkazdi.
Seminarda senatorlar, mahalliy Kengashlar vakillari, Vakillik organlari faoliyatini o‘rganish markazi xodimlari, mutaxassislar va jurnalistlar ishtirok etdilar. Mahalliy davlat hokimiyati organlari oldida turgan vazifalar hamda ularni samarali bajarish yo‘llari muhokama etildi.
Hududiy davlat organlari faoliyatini nazorat qilishga alohida e’tibor qaratildi. Qonunchilikka ko‘ra, mahalliy Kengashlar prokuratura, ichki ishlar, adliya va boshqa idoralar rahbarlarining hisobotlarini tinglashi lozim. Bu esa qonuniylikka rioya etilishi, fuqarolarning huquqlari va davlat manfaatlarini himoya qilish borasidagi ishlarni baholash imkonini beradi.
Bundan tashqari, seminarda Senat tomonidan ishlab chiqilgan o‘quv qo‘llanma taqdim etildi. Unda bunday hisobotlarni tinglash tartibi batafsil tushuntirilgan. Ishtirokchilar doimiy komissiyalar faoliyatining asosiy vazifalari va huquqiy asoslarini, shuningdek, hududiy hokimiyat organlari faoliyatini nazorat qilish jarayonida e’tibor qaratish lozim bo‘lgan asosiy masalalarni muhokama qildilar.
Tadbir yakunida davlat organlari faoliyati ustidan deputatlik nazoratini kuchaytirish zarurligi to‘g‘risida qaror qabul qilindi. Bu hududlarda qonun ustuvorligini ta’minlash, qonuniylikka rioya etish va fuqarolar huquqlarini himoya qilish samaradorligini oshirish imkonini beradi. Shuningdek, mahalliy Kengashlarga muntazam ravishda uslubiy yordam ko‘rsatish, deputatlar va mutaxassislar ishtirokida qonunchilik tashabbuslari muhokamasini faollashtirish bo‘yicha kelishuvga erishildi.