Qonunchilik palatasi qo‘mitalari huzurida jamoatchilik kengashlari tuziladi
Shavkat Mirziyoyev parlamentdagi hal qilinishi lozim bo‘lgan muammolarni ko‘rsatib o‘tdi. Xususan, u to‘g‘ridan-to‘g‘ri amal qiluvchi va samarali ijro mexanizmlariga ega qonunlar ulushi pastligicha qolayotganini ta’kidladi. Deputatlarning saylov okruglaridagi nazorati yetarlicha faol emas, parlament nazoratini esa kuchaytirish zarur.
Prezident Qonunchilik palatasi qo‘mitalari huzurida jamoatchilik kengashlarini tuzish, vazirliklar bilan hamkorlikni kuchaytirish, partiya va fraksiyalar intizomini mustahkamlash taklifini kiritdi. U qonunchilik faoliyatining asosiy yo‘nalishlarini belgilab berdi. Bular qatoriga xususiy ta’limni qo‘llab-quvvatlash, majburiy tibbiy sug‘urtani joriy etish, energetikani rivojlantirish, sun’iy intellekt va franchayzing sohasidagi munosabatlarni tartibga solish kiradi.
Hududlarning moliyaviy imkoniyatlarini oshirishga alohida e’tibor qaratildi. Prezident 2025-yildan boshlab yer va mol-mulk soliqlaridan tushadigan barcha mablag‘lar, shuningdek, daromad solig‘ining yarmini mahalliy byudjetlarga qoldirishni taklif etdi.