O‘zbekiston Prezidenti Yaponiya delegatsiyasi bilan uchrashdi
Prezident Shavkat Mirziyoyev Toshkentda Yaponiya Bosh vazirining maxsus maslahatchisi Akixisa Nagasima boshchiligidagi delegatsiyani qabul qildi. Yaponiya delegatsiyasi rahbari Yaponiya Bosh vaziri Sigeru Isibaning salomini va shaxsiy maktubini yetkazib, Yaponiyaning O‘zbekiston bilan strategik hamkorlikni mustahkamlashga sodiqligini ta’kidladi.
Uchrashuv davomida iqtisodiyot, innovatsiyalar, energetika, sanoat, infratuzilma, ta’lim va madaniy almashinuv sohalarida hamkorlikni kengaytirish masalalari muhokama etildi. Turizm va mehnat migratsiyasi dasturlarini rivojlantirishga alohida e’tibor qaratildi.
2024-yilda mamlakatlar o‘rtasidagi tovar aylanmasi 35 foizga oshdi, Yaponiya kompaniyalari va banklari bilan qo‘shma loyihalarning umumiy qiymati 12 milliard dollardan oshib ketdi. O‘zbekistonda 100 ga yaqin qo‘shma korxona, jumladan, O‘zbekiston-Yaponiya markazi muvaffaqiyatli faoliyat yuritmoqda.
Prezidentimiz yuqori darajadagi faol muloqotlar va tashriflar almashinuvini davom ettirishni qo‘llab-quvvatladi. U ikki tomonlama hamkorlik sur’atidan mamnunligini bildirib, Yaponiyaga joriy yil aprel oyida Osaka shahrida o‘tkaziladigan “EKSPO” butunjahon ko‘rgazmasida muvaffaqiyat tiladi.