MOQ sportchilarning 2028-yilgi Olimpiadaga tayyorgarligini muhokama qildi
O‘zbekiston Milliy olimpiya qo‘mitasi (MOQ) rahbariyati Og‘ir atletika federatsiyasi va Yengil atletika federatsiyasining 2028-yilda Los-Anjelesda bo‘lib o‘tadigan yozgi Olimpiya o‘yinlariga tayyorgarlik borasidagi taqdimotlari bilan tanishdi.
Sport vaziri o‘rinbosari va Og‘ir atletika federatsiyasi raisining birinchi o‘rinbosari Shahrullo Mahmudov og‘ir atletika sport turini rivojlantirish rejalarini taqdim etdi. U o‘z nutqida iqtidorli sportchilarni milliy musobaqalar orqali saralab olish va xalqaro musobaqalarda ishtirok etishning muhimligini ta’kidladi, shuningdek, murabbiylar malakasini oshirish zarurligiga alohida e’tibor qaratdi.
Misrlik milliy murabbiy Xolid Hasan hozirda Bahraynda o‘tkazilayotgan jahon chempionati terma jamoa sportchilari darajasini baholashga yordam berishini, Qatarda bo‘lib o‘tadigan yoshlar o‘rtasidagi Osiyo chempionati esa istiqbolli sportchilarni aniqlash uchun yana bir imkoniyat bo‘lishini ta’kidladi.
Yengil atletika federatsiyasi ham o‘z rejalarini taqdim etdi. Terma jamoa bosh murabbiyi Go‘zal Xubbiyeva jamoada iqtidorli yoshlar borligi va ushbu sport turida O‘zbekistonning mavqeini mustahkamlash zarurligini ma’lum qildi. Ta’kidlanishicha, yengil atletika Olimpiya medallarining asosiy manbai hisoblanadi, biroq so‘nggi yillarda O‘zbekiston terma jamoasining bu yo‘nalishdagi natijalari kutilgandan past bo‘lgan.
Muhokama davomida har ikki federatsiya vakillari O‘zbekiston delegatsiyasini 2028-yilgi Olimpiadaga tayyorlash bo‘yicha Prezident qarori loyihasiga kiritiladigan takliflarni ilgari surdilar. Asosiy e’tibor sportchilarni sifatli saralash, murabbiylar tarkibini kuchaytirish va tayyorgarlik darajasini oshirish uchun xalqaro musobaqalardan samarali foydalanishga qaratildi.