O‘zbekistonlik dzudochilar Xalqaro dzudo federatsiyasi mukofotlariga nomzod bo‘lishdi
Xalqaro dzudo federatsiyasi (IJF) 2024 yil yakunlari bo‘yicha eng yaxshilarni aniqlash uchun nomzodlar ro‘yxatini e’lon qildi. Nomzodlar orasida bir nechta o‘zbek dzudosi vakillari ham bor.
O‘zbekiston dzudo federatsiyasi tashabbusi bilan yaratilgan judogirls.uz loyihasi “Bolalar uchun dzudo” nominatsiyasiga tavsiya etildi. “Yil voqeasi” nominatsiyasida Diyora Keldiyorovaning yaponiyalik Uta Abe ustidan qozongan g‘alabasi alohida e’tirof etildi. “Muvaffaqiyatli murabbiylik” nominatsiyasida O‘zbekiston ayollar terma jamoasi murabbiyi Marko Shpittka nomzod sifatida ko‘rsatildi. Keldiyorova shuningdek, “Yilning eng yaxshi dzudochisi” unvoniga da’vogarlik qilmoqda. “Yil ipponi” nominatsiyasiga Dushanbedagi “Katta shlem” turnirida namoyish etilgan Muhammad Jumayevning usuli nomzod qilib ko‘rsatildi.
G‘oliblar uchun ovoz berish JudoTV platformasida o‘tkazilmoqda. Ovoz berish 2025 yil 10 yanvargacha davom etadi. Sportchiga o‘z ovozingizni havola orqali berishingiz mumkin.