O‘zbekistonda futzal federatsiyasi tashkil etildi
Toshkentda 2025-yilda faoliyatini boshlaydigan O‘zbekiston futzal federatsiyasining taqdimot marosimi bo‘lib o‘tdi. Federatsiyani tashkil etish to‘g‘risidagi qaror 17-dekabrdagi ta’sis yig‘ilishidan so‘ng qabul qilingan bo‘lib, u mamlakatda futzal, mini-futbol va plyaj futbolini rivojlantirishga qaratilgan.
O‘zbekiston futbol assotsiatsiyasi (O‘FA) bosh kotibi Avaz Maqsumov ma’lum qilishicha, tashkilot ushbu sport turlarini yangi bosqichga ko‘tarish maqsadida O‘FA va Professional futbol ligasi sa’y-harakatlarini birlashtirmoqda. Yig‘ilish davomida federatsiya nizomi tasdiqlandi va hujjatlar rasmiy ro‘yxatdan o‘tkazilishi uchun Adliya vazirligiga topshirildi.
Federatsiya prezidenti etib tadbirkor va BMB Holding kuzatuv kengashi raisi Bekzod Mamatqulov saylandi. “O‘zsanoatqurilishbank” boshqaruvi raisi Aziz Akbarjonov vitse-prezident, Ma’rufjon Abdullayev esa bosh kotib lavozimlariga tayinlandi.
O‘FA prezidenti Abdusalom Azizov federatsiyaning tashkil etilishi O‘zbekiston terma jamoasining joriy yilda mamlakatimizda o‘tkazilgan futzal bo‘yicha jahon chempionatidagi muvaffaqiyatsiz ishtirokidan so‘ng zarurat tug‘dirganini ta’kidladi. Milliy jamoaning o‘z guruhida so‘nggi o‘rinni egallashi bu sport turini rivojlantirish yondashuvini qayta ko‘rib chiqishni taqozo etdi.
Yangi federatsiya futzalni ommalashtirish, yoshlarni jalb qilish va sog‘lom turmush tarzini targ‘ib qilish bo‘yicha faol ish olib borishni rejalashtirmoqda.