Velosport bo‘yicha terma jamoada xorijlik murabbiylar ishlaydi
O‘zbekiston velosport federatsiyasining matbuot anjumanida yangi Olimpiya sikliga tayyorgarlik dasturi muhokama qilindi va federatsiyaning so‘nggi yillardagi faoliyati sarhisob qilindi. Ma’ruzachi sifatida Tashkent City Professional Cycling Team klubi menejeri Farrux Xudoyqulov so‘zga chiqib, erishilgan yutuqlar va rejalar haqida so‘zlab berdi.
Xudoyqulov muhim yutuq — Parij-2024 yozgi Olimpiya o‘yinlariga to‘rtta yo‘llanmani qo‘lga kiritganini ta’kidladi, shuningdek, klubning xalqaro musobaqalardagi ishtiroki haqida gapirdi. U kelgusi yirik musobaqalarga, jumladan, 2025-yilda Toshkentda bo‘lib o‘tadigan yoshlar o‘rtasidagi Osiyo o‘yinlari, 2026-yilda Aichi-Nagoyda bo‘lib o‘tadigan yozgi Osiyo o‘yinlari va 2028-yilda Los-Anjelesda bo‘lib o‘tadigan Olimpiadaga tayyorgarlik dasturini taqdim etdi.
Shuningdek, terma jamoaning xorijlik murabbiylari — italiyalik Juzeppe Toni, germaniyalik Yoxan Dombrush va ukrainalik Volodimir Starchik ham ishtirok etdi.