O‘zbekiston va Italiya ot sporti federatsiyalari hamkorlikni mustahkamlamoqda
Italiyaning Verona shahrida ot sporti olamida muhim voqea hisoblangan Fieracavalli xalqaro ko‘rgazmasi o‘tkazilmoqda. Tadbirda Bahromjon G‘oziyev boshchiligidagi O‘zbekiston otchopchelik va ot sporti federatsiyasi vakillari ishtirok etmoqda.
126 yildan beri o‘tkazib kelinayotgan mazkur ko‘rgazma milliy federatsiyalar o‘rtasidagi aloqalarni mustahkamlash, ot sporti sohasidagi tajriba va yangi yutuqlar bilan o‘rtoqlashish uchun ajoyib imkoniyat yaratadi. Tadbir ushbu sohani rivojlantirish uchun muhim maydonga aylandi.
Tashrif doirasida G‘oziyev Italiya ot sporti federatsiyasi prezidenti Marko di Paolo va bosh kotibi Simone Perillo bilan uchrashdi. Ular hamkorlikni kuchaytirish, qo‘shma musobaqalar tashkil etish va zotdor otlarni ko‘paytirish borasida tajriba almashish imkoniyatlarini muhokama qildilar.
Bundan tashqari, ko‘rgazmada O‘zbekiston burchagi tashkil etildi. U yerda tashrif buyuruvchilar mamlakatimizda ot sportining rivojlanishi bilan tanishish va O‘zbekistonda o‘tkazilgan xalqaro musobaqalardan videolarni tomosha qilish imkoniyatiga ega bo‘ldilar.