O‘zbekiston Osiyo Olimpiya kengashi yig‘ilishida ishtirok etdi
Quvaytda Osiyo Olimpiya Kengashi (OOK) Ijroiya qo‘mitasining 90-yig‘ilishi bo‘lib o‘tdi. Asosiy e’tibor tashkilotni rivojlantirish rejalariga va yirik sport tadbirlariga tayyorgarlik ko‘rishga qaratildi.
Yig‘ilishda O‘zbekiston nomidan OOK vitse-prezidenti, Milliy olimpiya qo‘mitasi raisining birinchi o‘rinbosari Otabek Umarov, MOQ bosh kotibi Oybek Qosimov va Dzyudo federatsiyasi raisi Azizjon Komilov ishtirok etdilar.
Ishtirokchilar 2026-yilda Aichi-Nagoyada o‘tkaziladigan yozgi Osiyo o‘yinlariga tayyorgarlik masalasini muhokama qildilar. Bunda tayyorgarlikning asosiy yo‘nalishlari bo‘yicha taqdimotlar ko‘rib chiqildi. OOK komissiyalari ham amalga oshirilgan ishlar to‘g‘risida hisobot berdilar. Shuningdek, OOKning Quvaytdagi bosh qarorgohining avtonom maqomini mustahkamlovchi bitim imzolandi.
Tashrif doirasida O‘zbekiston delegatsiyasi OOK rahbariyati vakillari va Quvayt rasmiy shaxslari bilan uchrashuvlar o‘tkazdi. Muzokaralarda sport sohasidagi hamkorlikni mustahkamlash va kelajakdagi o‘zaro aloqalarni rivojlantirish masalalari muhokama qilindi.