O‘zbekiston ANOC Bosh Assambleyasida ishtirok etdi
Portugaliyada Milliy Olimpiya Qo‘mitalari Assotsiatsiyasi (ANOC) Bosh Assambleyasi bo‘lib o‘tdi, unda O‘zbekiston nomidan MOQ Bosh kotibi Oybek Qosimov va Xalqaro munosabatlar departamenti direktori Kamoliddin Ergashev ishtirok etdi.
Uchrashuvda Xalqaro Olimpiya qo‘mitasi prezidenti Tomas Bah so‘zga chiqib, 2024-yilda Parijda bo‘lib o‘tadigan yozgi Olimpiya o‘yinlariga tayyorgarlik yuqori darajada ekanini ta’kidladi. 2026-yilda Dakar shahrida o‘tkaziladigan o‘smirlar Olimpiya o‘yinlariga, 2026-yilda Milan Kortindagi qishki Olimpiya o‘yinlariga va 2028-yilda Los-Anjelesda bo‘lib o‘tadigan yozgi Olimpiya o‘yinlariga tayyorgarlik bilan shug‘ullanuvchi Tashkiliy qo‘mitalarning hisobotlari tinglandi.
Tadbir davomida Qosimov Bah va boshqa bir qator yuqori martabali shaxslar, jumladan, Iordaniya shahzodasi Faysal al-Husayn, Xalqaro velosipedchilar uyushmasi prezidenti David Lapartin va Xalqaro gimnastika federatsiyasi prezidenti Morinari Vatanabe bilan uchrashuvlar o‘tkazdi.
Uchrashuvlarda hamkorlikning yangi bosqichlari va Markaziy Osiyoda Olimpiya harakatini rivojlantirish bilan bog‘liq masalalar ko‘rib chiqildi. Qosimov, shuningdek, Prezidentimiz rahnamoligida O‘zbekistonda sport sohasini yuksaltirish va 2025-yilda Toshkentda bo‘lib o‘tadigan yoshlar o‘rtasidagi Osiyo o‘yinlariga tayyorgarlik ko‘rish borasida amalga oshirilayotgan islohotlar haqida so‘zlab berdi.
Bundan tashqari, ANOC yilning eng yaxshi sportchilarini nomladi va ularning yutuqlari uchun mukofotlarni topshirdi.